திருக்குறளில் உள்ள #கடவுள்_வாழ்த்து எனும் அதிகாரம் #திருவள்ளுவர்_எழுதியது_இல்லை !

https://m.facebook.com/story.php?story_fbid=pfbid02smZkmpF9EXEKZ4B8Jizi2BF2EncLLinYsapZjNRM5XuFwMVqFNBYvTacnxj8BQ6ul&id=100000324268158

திருக்குறளில் உள்ள #கடவுள்_வாழ்த்து எனும் அதிகாரம் #திருவள்ளுவர்_எழுதியது_இல்லை !

இப்படி சொல்பவர் பெரியாரோ அல்லது கடவுள் நம்பிக்கை இல்லாத அறிஞர் ஒருவரோ அல்ல.

திருக்குறளை ஆய்வு செய்து திருக்குறளில் உள்ள இடைச்செருகல்களை ஆதாரங்களுடன் நிறுவியவர் #வ_உ_சி அவர்கள்.ஆம் இந்திய சுதந்திர போராட்ட தியாகி என புகழப்படும் கப்பலோட்டிய தமிழன் வ.உ.சிதம்பரம் பிள்ளை அவர்களேதான். வ.உ.சி.கடவுள் நம்பிக்கை அதிகம் உள்ளவர் என்பது மிகவும் குறிப்பிடத்தக்கது.

திருக்குறளில் #கடவுள்_வாழ்த்து எனும் அதிகாரம் மட்டுமல்ல,#வான்_சிறப்பு, #நீத்தார்_பெருமை ஆகிய அதிகாரங்களும் திருவள்ளுவர் எழுதியவை அல்ல.அவை #இடைச்செருகல்களே என்று ஆய்வு செய்து கூறுகிறார் வ.உ.சி.“அவை திருவள்ளுவர் காலத்திற்குப் பிற்காலமும் முந்திய உரையாசிரியர்கள் காலத்திற்கு முற்காலமுமாகிய இடைக் காலத்துப் புலவர் ஒருவரால் பாடிச் சேர்க்கப் பட்டவையென்றும் யான் கருதுகிறேன்” என்று கூறுகிறார்.

பரிமேலழகர் என்பவர் எழுதிய திருக்குறள் உரை ஆரிய சார்பானதாக இருப்பதை ஏற்க மறுத்து (அப்போது சுயமரியாதை இயக்கமோ,பகுத்தறிவு கருத்துக்களோ வீரியமாக பேசப்படாத காலம் என்பதையும் கவனத்தில் கொள்ளவேண்டும்.) ஏற்கும்படி இருக்கும் மணிகுடவர் எழுதிய திருக்குறள் உரையிலிருந்து திருக்குறள் அறத்துப்பால் மணிக்குடவர் பதிப்பு எனும் தலைப்பில் 140 பக்கங்கள் கொண்ட நூலை 1917  ஆம் ஆண்டு பதிப்பித்தார் வ.உ.சி.

1930 - 1932 களில் வெளிவந்த ''தமிழ்ப் பொழில்'' (துணர் 5/மலர் 6) எனும் இதழில் பாயிர ஆராய்ச்சி எனும் தலைப்பில் (பக்கம்: 232-237)எழுதியுள்ள கட்டுரையில் வ.உ.சி.அவர்கள் இந்த ஆய்வுகளை தொடராக எழுதியுள்ளார்.

பாயிர ஆராய்ச்சி எனும் ஆய்வு கட்டுரையில் வ.உ.சி அவர்கள் திருக்குறளின் இடைச்செருகல்கள் குறித்து எழுதியுள்ள கருத்துக்களின் சாரம் :

திருக்குறளின் இம்மூன்று அதிகாரங்களும் தற்காலத்தில் மிகவும் புகழ் பெற்றவை. கடவுள் வாழ்த்து, வான் சிறப்பு, நீத்தார் பெருமை ஆகிய இம் மூன்று அதிகாரங்களிலுள்ள முப்பது குறட்பாக்களையும் திருவள்ளுவர் எழுதியிருக்க முடியாது என்பதற்கு காரணங்களை முன் வைக்கிறார் வ.உ.சி.

1.            கடவுள் வாழ்த்து,வான் சிறப்பு, நீத்தார் பெருமை பாடல்களில் பிற பாடல்களைப்போலச் சொற்செறிவும் பொருட்செறிவும் இல்லை.

2.            கடவுள் வாழ்த்து,வான் சிறப்பு, நீத்தார் பெருமை ஆகிய பாடல்களின் பொருள்கள் பல தடைகளுக்கு இடம் கொடுக்கின்றன.

3.            மெய்யுணர்தல், துறவு என்ற தலைப்புகளில் நூலின் உள்ளே அதிகாரங்கள் இருப்பதால் இதற்கு முரணான தலைப்புகளான கடவுள் வாழ்த்து, நீத்தார் பெருமை ஆகியவற்றை நூலின் தொடக்கத்தில் அதாவது பாயிரத்தில் வைத்திருப்பது பொருத்தமானதல்ல.

4. மெய்யுணர்தல் எனும் தலைப்பிலுள்ள அதிகாரத்தில் கடவுளுக்குக் கூறியுள்ள இலக்கணங்களைக் கொண்டு பார்க்கும்போது அவற்றையும் இம்மூன்று அதிகாரங்களையும் ஒருவரே எழுதியிருக்க முடியாது. (வ.உ.சியின் இக்கருத்து விரிவான ஆய்வுக்குரியது).

5.            துறவு மற்றும் நீத்தார் பெருமை ஆகிய அதிகாரங்களில் உள்ள பாடல்களை ஒப்பிட்டுப் பார்த்தால், இரண்டையும் ஒருவரே இயற்றியிருக்க முடியாது.

6.            மழையைச் ‘சிறப்பிற்றணிப்பாருமில்லை, வறப்பிற்றரிவாருமில்லை.” எனவே, ‘வான் சிறப்’பைக் கூறுவதால் பயன் ஒன்றுமில்லை.

7.  திருக்குறள் 10 என எண்ணிக்கையில் இருக்கும் போது 10ன் மடங்குகளாக 130 அதிகாரமும் 1300 குறள்கள் மட்டுமே இருந்திருக்க வேண்டும்.

---------------------------------------------------------------------------------

திருவள்ளுவரே கடவுள் வாழ்த்தை எழுதி இருக்கிறார் கடவுள் இருப்பதை ஏற்றுக்கொண்டார் என ஏமாற்றி வந்தவர்கள் இப்போது திருவள்ளுவருக்கு காவிச்சாயம் பூச முயலும் அயோக்கியத்தனமான முயற்சியில் இறங்கியிருக்கும் இவ்வேளையில் கடவுள் வாழ்த்து,வான் சிறப்பு, நீத்தார் பெருமை ஆகியவை திருக்குறளே அல்ல.அவை திருவள்ளுவர் எழுதியவையும் அல்ல.இந்த 3 அதிகாரங்களும் இடச்செருகல்களே என்கிற வ.உ.சி.அவர்களின் ஆய்வுக்கட்டுரையை நாம் மீள வாசிக்க வேண்டியதும் அதனை பரப்புவதும் அவசியமாகும்.

- பரிமள ராஜன் முகநூல் பக்கத்திலிருந்து.... ஆண்டு 2019

2 ஆயிரம் ஆண்டு பழைமையான தமிழ் எழுத்துகள் பொறித்த பானை ஓடுகள் கண்டுபிடிப்பு

  November 04, 2022 • Viduthalai

காளையார்கோவில், நவ.4- காளையார் கோவில் பாண்டியன் கோட்டையில் 2 ஆயிரம் ஆண்டு பழைமையான தமிழ் எழுத்துகள் பொறித்த பானையோடு கண்டுபிடிக்கப்பட்டது. சிவகங்கை மாவட்டம், காளையார்கோவில்  பாண்டியன் கோட்டையில் 2 ஆயிரம் ஆண்டு பழைமையான தமிழ் எழுத்து பொறிக்கப்பட்ட பானை ஓடு  சிவகங்கை தொல்நடைக் குழுவினரால் கண்டுபிடிக்கப்பட்டுள்ளது.

இது குறித்து சிவகங்கை தொல்நடைக்குழு நிறுவனர் காளிராசா கூறியதாவது: பாண்டியன்கோட்டை பகுதியில் மேற்பரப்பில் கிடந்த ஓட்டை எடுத்து சுத்தம் செய்து பார்த்ததில் அது 2 ஆயிரம் ஆண்டுகள் பழைமையான தமிழ் எழுத்துகள் பொறிக்கப்பட்ட பானையோடு என்பது உறுதி செய்யப் பட்டது. கீழடியில் வெட்டப்பட்டுள்ள அகழாய்வு குழிகளைப்போல, இதன் இரண்டு புறங்களிலும் மண் அடுக் குகளும் பானை ஓட்டு எச்சங்களும் உடைந்த நிலையில் அரைகுறையான பானைகளும் காணப்படுகின்றன.

இந்த வாய்க்காலில் தான் தமிழ் எழுத்து பொறித்த பானையோடு கிடைக்கப் பெற்றுள்ளது. தமிழ் எழுத்து பொறிக்கப்பட்ட பானை ஓட்டில், கருப்பிலும் சிவப்பிலும் எழுத்துப்பொறிப்பு காணப்படுகிறது, பானை ஓட்டின் உட்புறம் முழுமையாக கரிய நிறமாக உள்ளது. இந்த ஓடு 7 செமீ அகலமும் ஏழரை செ.மீ உயரமும் உடையதாக உள்ளது. அய்ந்து எழுத்துக்கள் இடம்பெற்றுள்ளன, மோ, ச, ர, ப, ன்   ஆகிய தமிழி எழுத்துகள் வெளிப்படையாக தெரிகின்றன.

எழுத்துகள் தெளிவுற வாசிப்ப தற்காக தொல்லியல் அறிஞர்களின் பார்வைக்கு அனுப்பப்பட்டதில் அவர்கள் அய்ந்து எழுத்துகள்  மோ, ச, ர, ப, ன்   போன்று வெளிப்படையாக தெரிந்தாலும் ர என்கிற எழுத்து ‘த’ வாக இருக்கலாம். சற்று ஒரு கோடு சிதைவுற்று இருக்கலாம். மோசதப[ன்] மோசிதப[ன்] என்று இருந்திருக்கலாம் என கருத்து தெரிவித்துள்ளனர்.

மேலும் சங்க காலத்திலே மோசிகீரன் என்ற பெயர் வழக்கில் உள்ளதால் மோசிதபன் என்று கருதவும் இடம் உண்டு. முறையான அகழாய்வை தமிழ்நாடு அரசு தொல்லியல் துறை மேற்கொண்டால் காளையார்கோவி லின் தொன்மையும், பாண்டியர்களின் கோட்டை கட்டுமானங்களும் தமிழ் நாட்டின் தொன்மையும் வெளிப்படும். இவ்வாறு கூறினார். காளையார்கோவில் பாண்டியன் கோட்டையில் கிடைக்கப் பெற்ற தமிழ் எழுத்துப் பொறித்த பானை ஓட்டை, அதன் தொன்மை, பெருமை, பாதுகாப்பும் கருதி சிவகங்கை அரசு அருங்காட்சியகத்தில் ஒப் படைக்க சிவகங்கை தொல்நடைக்குழு முடிவு செய்துள்ளது.

சிலப்பதிகாரம் என்பது #கற்பனைக்கதையல்ல..என்பதனை அறிவீரா???

#சிலப்பதிகாரம் என்பது #கற்பனைக்கதையல்ல..என்பதனை அறிவீரா???

சிலப்பதிகாரம் என்பது கற்பனைக் கதையல்ல வரலாற்று நிகழ்வு என்பதனை உலகிற்கு உணர்த்தியவர், தஞ்சாவூர் கரந்தை தமிழ்ச் சங்கத்தின்,கரந்தை புலவர் கல்லூரியில் பேராசிரியராக பணியாற்றிய, மறைந்த மரியாதைக்குரிய ஆய்வறிஞர் பேராசிரியர் சி.கோவிந்தராசனார் அவர்கள்.

சிலப்பதிகாரத்தைத்  திறம்பட கற்றவர், சிலப்பதிகாரத்தில் ஊறித் திளைத்தவர். அவரி்ன் மனதில் நீண்ட நாட்களாகவே ஒர் ஆசை,ஏக்கம்,கனவு.சிலப்பதிகாரத்தில் கண்ணகி பயணம் செய்த பாதை வழியாகவே ஒரு பயணம் செய்தால் என்ன என்ற தணியாத தாகம்.எண்ணி துணிந்து இறங்கினார்.

1945 ஆம் ஆண்டு கண்ணகி பயணித்த பாதை வழியாகவே இவரும் நடந்தே சென்றார்.தன் ஊதியத்தைச் செலவிட்டு நடந்தார்.பின் தன் உடமைகள் ஒவ்வொன்றையும் வி்ற்று விற்று காசாக்கிக் கொண்டே 17 ஆண்டுகள் நடந்து முடிவில் சிலப்பதிகாரம் கற்பனைக் கதையல்ல வரலாற்று நிகழ்வு என்பதை உலகிற்கு உணர்த்தினார்.

1945 ம் ஆண்டு மயிலாடுதுறை அருகில் கடற்கரையில் மீனவர்களின் ஒரு சில குடிசைகளுடன் மணற் பரப்பும்,மணல் மேடுகளும்,கள்ளியுடன் காரைச் செடிகளும் செறிந்த புதர்களும்,சவுக்கு தோப்புகளும்,புனங்காடுகளும் சூழ்ந்திருந்த பட்டணம் என்று,அன்று அழைக்கப்பட்ட பகுதியே,பண்டைய புகார் நகரம் இருந்த இடம் என்பதைக் கண்டு பிடித்தார்.கடலடி ஆய்வு செய்து கடற்கோளினால் அளிந்து கடலடியில் மறைந்து நிற்கும் நிலப்பரப்பே,காவேரிப் பூம்பட்டிணம் கண்ணகி பிறந்த இடம் என்பதை உறுதி செய்தார்.

1945 ஆம் ஆண்டு பூம்புகாரில் ஆய்வினைத் தொடங்கிய இவருக்கு,கால் நடையாக ஆராய்ந்து,ஆராய்ந்து, நடந்து,நடந்து,மதுரை வரை செல்வதற்கே பன்னிரண்டு ஆண்டுகள் தேவைப்பட்டன.

மதுரையில் கோவலனை இழந்த கண்ணகி,சேரநாடு நோக்கிச்  சென்ற வழியில்,இளங்கோ அடிகள் தந்த குறிப்புகளின் உதவியுடன் நகரத் தொடங்கினார்.

1945 ஆம் ஆண்டு தொடங்கிய பயணம் 1963 ஆம் ஆண்டு நவம்பர் 17 ஆம் நாள் மலையினுள் மறைந்து கிடந்த கோயிலைக் காணும் அந்த இனிய நிகழ்வில் நெகிழ்ந்துள்ளார்.

கடந்த 2012 டிசம்பரில் குடியரசு தலைவர் பிரணாப் முகர்ஜி தொல்காப்பியர் விருது வழங்கி சிறப்பித்தார்.

கண்ணகி கோட்டத்தைக் கண்டுபிடித்தது எவ்வாறு? என்பது குறித்து தினமணி நாளிதழுக்கு சில வருடங்களுக்கு முன் திரு.கோவிந்தராசனார் அளித்த பேட்டி..

’’சிலப்பதிகாரத்தை முழுமையாகப் படித்தேன். அதில் எல்லாம் தெளிவாக கூறப்பட்டுள்ளது. சோழ நாட்டின் தலைநகரமான பூம்புகாரில் இருந்து கோவலனும் கண்ணகியும் நடந்து சென்ற பாதையாக அதில் கூறப்பட்டுள்ள இடங்களுக்கெல்லாம் நடந்தே சென்றேன். மதுரையில் கண்ணகி பாண்டிய மன்னனிடம் நீதி கேட்டு அது கிடைக்காததால் நகரை எரித்துவிட்டு தலைவிரி கோலமாய் மேற்கு நோக்கிச் செல்கிறாள். சேர நாட்டின் மலைப் பகுதியான முருகவேல் குன்றத்துக்கு (இன்றைய மங்களதேவி மலை) சென்று அங்கு வானுலகில் இருந்து ரதத்தில் வந்திறங்கிய கோவலனுடன் இணைந்து கண்ணகி விண்ணுலகம் சென்றதாக சிலப்பதிகாரம் கூறுகிறது.

கண்ணகி நடந்து சென்றதாக கூறப்பட்ட பாதை வழியாக நானும் இரவு, பகல் பாராமல் நடந்தேன். மதுரையில் இருந்து 90 மைல் தொலைவில் உள்ள மங்களதேவி மலையை அடைந்தேன். 40 மைல் சுற்றளவில் கண்ணகி கோட்டத்தை தேடி அலைந்தேன். இறுதியில் அந்த கோட்டத்தைக் கண்டுபிடித்தேன்.’’

கண்ணகி கோட்டத்திற்கு அப்படி என்ன சிறப்பு?

’’வானுலகில் இருந்து ரதத்தில் இறங்கி வந்த கோவலனுடன் கண்ணகியும் விண்ணுலகம் சென்றதை நேரில் கண்ட மலைவாழ் மக்கள் அந்த செய்தியை மன்னன் சேரன் செங்குட்டுவனிடம் கூறுகிறார்கள். மன்னனின் மனைவி அந்த இடத்தில் பத்தினித் தெய்வமான கண்ணகிக்கு ஒரு கோயில் கட்ட வேண்டும் என எண்ணுகிறாள். அதன் பின்பு வடபுலத்து அரசர்களை வெற்றி கண்டு இமயமலையில் கல்லெடுத்து அதை கங்கையில் நீராட்டி தலைச்சுமையாக இங்கு கொண்டு வந்து அந்தக் கல்லில் கண்ணகிக்கு சிலை வடித்து முருகவேல் குன்றத்தில் நிறுவி நாள்தோறும் வழிபாடும், விழாக்களும் நடத்தி வந்தான் மன்னன். அத்தகைய சிறப்பு மிக்க கண்ணகி கோட்டம் சுமார் இரண்டாயிரம் ஆண்டுகளுக்கு முன்பு கட்டப்பட்டதாக குறிப்புகள் உள்ளன.’’

அது கண்ணகி கோட்டம்தான் என்பதை எப்படி உறுதி செய்தீர்கள்?

’’மண்டிக்கிடந்த புதருக்குள் சிறிய கோட்டைச் சுவர் போன்ற கல் கட்டடத்திற்குள் கண்ணகி சிலை இருந்தது. அந்த கற்களில் தமிழ் வட்டெழுத்தும், முற்கால பாண்டியர் காலத்து தமிழ் எழுத்துகளும் காணப்பட்டன. அங்கு சிலப்பதிகாரத்தில் கூறப்பட்டுள்ள பழங்கால மலைவாழ் மக்கள் மட்டும் இல்லையே தவிர, எஞ்சிய வன விலங்குகள், இயற்கை காட்சிகள், வேங்கை மரங்கள் என அத்தனை அடையாளங்களும் ஒருங்கே காணப்பட்டன.

மேலும், அங்கிருந்த கண்ணகி சிலை, இமயமலை கல்லில் செதுக்கப்பட்டது என்பதால், அந்த கல்லை ஆய்வுக்கு உட்படுத்தினேன். அது மாதிரியான கல் அருகில் உள்ள மலைகளிலோ அல்லது தமிழ்நாட்டில் உள்ள மலைகளிலோ இல்லை. இறுதியில் இமயமலை கல்லுடன் ஒப்பிட்டுப் பார்த்து உறுதி செய்தேன். தலையில் சுமந்து வரும் எடையளவில் இருந்த கல்லில் செதுக்கப்பட்டுள்ளது கண்ணகி சிலை. அந்தச் சிலையைப் பாதுகாக்கும் வகையில் எனது வீட்டில் வைத்திருந்தேன். தகவலை அறிந்த அப்போதைய தமிழக முதல்வர் மு. கருணாநிதி என்னை அழைத்து கண்ணகி சிலையைக் கேட்டார். அவர் கேட்டபடி அரசிடம் ஒப்படைத்து விட்டேன்.

தமிழர்களின் வரலாற்றை செப்பம் செய்ய வேண்டும் என்ற நோக்கில் 50 ஆண்டுகளுக்கு முன்னர் கண்ணகி கோட்டம் கண்டேன். அதற்காக உழைத்தேன். பேர், புகழ், பதவி, பட்டம், விருது வரும் என நினைத்ததில்லை; ஆனால் அதெல்லாம்தான் இப்போது நடக்கிறது.’’

குறிப்பு;அய்யா அவர்கள் விண்ணுலகு அடைந்து விட்டார்கள்...

- சித்தர்கள் சித்தர் அறிவியல் முகநூல் பக்கம்

பல்கலைக் கழகங்களில் தமிழ் கட்டாயப் பாடம்

   September 02, 2022 • Viduthalai

சென்னை,செப்.2- இளநிலை பட்டப் படிப்புகளில் 2-ஆவது பருவத் தேர்வில் தமிழ் மொழி பாடத்தை பல்கலைக்கழகங்கள் சேர்க்க வேண்டும் என உயர்கல்வித் துறை உத்தரவிட்டுள்ளது.

தமிழ்நாடு உயர்கல்வித் துறையின்கீழ் இயங்கும் பல்கலைக் கழகங்களில் கற்றுத் தரப்படும் இளநிலை பட்டப் படிப்புகளில் 2-ஆம் பருவத் தேர்வில் தமிழ்மொழி பாடம் கட்டாயமாக்கப்பட்டுள்ளது. எனினும், சில கல்லூரிகளில் தமிழ் மொழி பாடம் நடத்தப்படவில்லை என புகார்கள் எழுந்தன. இதையடுத்து 2-ஆம் ஆண்டு பருவத்தில் தமிழ் மொழி பாடத்தை அவசியம் அமல்படுத்த வேண்டும் என கல்வி நிறுவனங்களுக்கு உயர்கல்வித் துறை தற்போது உத்தரவிட்டுள்ளது.

இதுகுறித்து உயர்கல்வித்துறை முதன்மைச் செயலர் தா.கார்த்திகேயன், அனைத்து பல்கலைக்கழக பதிவாளர் களுக்கும் அனுப்பிய சுற்றறிக்கை விவரம்:

உயர்கல்வித் துறையின்கீழ் இயங்கும் அனைத்து விதமான பல்கலைக்கழகங்களிலும் (அண்ணா மற்றும் தமிழ்நாடு ஆசிரியர் கல்வியியல் பல்கலைக்கழகம் நீங்கலாக) இளநிலை பட்டப் படிப்புகளில் 2-ஆம் ஆண்டு பருவத் தேர்வுகளில் தமிழ் மொழி பாடத் திட்டம் நடத்தப்பட்டு வருகிறது. சில பல்கலை.களில் தமிழ் மொழி பாடம் நடத்தப்படுவதில்லை என்று தெரியவந்துள்ளது.

இந்நிலையை மாற்றி, அனைத்து பல்கலைக் கழகங்களிலும் இளநிலை பட்டப் படிப்புகளுக்கான 2-ஆம் ஆண்டு பருவத் தேர்வுகளிலும் இனி தமிழ் மொழி பாடத்தை சேர்க்க முடிவு செய்யப்பட்டுள்ளது. அதற்கேற்ப இளநிலை பட்டப் படிப்புகளில் 2-ஆம் ஆண்டு பருவத்தில் இனி தமிழ்மொழி பாடத் திட்டத்தை சேர்ப்பதற்குரிய நடவடிக்கைகளை பல்கலைக் கழகங்கள் எடுக்க வேண்டும்.

வரலாற்றுச் சுவடு : தமிழ்த்தாய் வாழ்த்து கலைஞர் தந்த விளக்கம்!

ஜனவரி 1-15,2022 உண்மை

Leave A CommentOn வரலாற்றுச் சுவடு : தமிழ்த்தாய் வாழ்த்து கலைஞர் தந்த விளக்கம்!

சிறந்த தமிழ்ப் படம், சிறந்த தமிழ்ப்பட இயக்குநர், சிறந்த நடிகர், சிறந்த எழுத்தாளர், பாடலாசிரியர் என்று பல முனைகளில் திரைப்படத்துறையில் ஒவ்வொர் ஆண்டும் தேர்ந்தெடுக்கப்படுகிறவர்களுக்கு தமிழ்நாடு அரசின் சார்பில் பரிசுகள் வழங்குகிற நிகழ்ச்சியை அண்ணா அவர்கள் உருவாக்கியதை-யொட்டி 1970-ஆம் ஆண்டு மார்ச் திங்கள் நடைபெற்ற அந்தப் பரிசளிப்பு விழாவின்போது, இனித் தமிழ்நாடு அரசு நிகழ்ச்சிகளில் தொடக்கத்தில் இறை வணக்கம் என்பது தமிழ்த்தாய் வாழ்த்தாக இருக்கு-0மென்றும், “நீராருங் கடலுடுத்த’’ எனும் மனோன்மணீயம் சுந்தரனார் இயற்றிய அந்தப் பாடலே அந்த வாழ்த்தாக அமையுமென்றும் அறிவித்தேன்.

வாழ்த்துப் பாடலுக்கு ஏற்றவகையில் அந்தப் பாட்டை ஓரளவு குறைத்துக்கொள்ள வேண்டியதாயிற்று. மனோன்மணீயம் சுந்தரம் பிள்ளை எழுதிய அந்தப் பாடலில், சமஸ்கிருத மொழி உலக வழக்கு ஒழிந்த மொழி என்பதை, “ஆரியம் போல் உலக வழக்கு அழிந்தொழிந்து சிதையா உன்சீரிளமைத் திறம் வியந்து’’ என்று குறித்துத் தமிழ்மொழியைப் புகழ்ந்திருந்தார். அரசு நிகழ்ச்சியில் _- அதுவும் தமிழ்த்தாய் வாழ்த்தில் மற்றொரு மொழியைக் குறைத்தும் பழித்தும் கூறுதல் வேண்டாமென்பதற்காகவும் -”அழிந்து, ஒழிந்து” என்ற சொற்களை ஒரு பகுதியினர் அமங்கலச் சொற்கள் எனக் கருதி முகஞ்சுளிப்பர் என்பதற்காகவும்; அந்த வரியையே அகற்றி விட்டு இசையமைக்குமாறு கேட்டுக்கொண்டேன்.

“நீராருங் கடலுடுத்த நிலமடந்தைக்கெழிலொழுகும்

சீராரும் வதனமெனத் திகழ்பரதக் கண்டமிதில்

தெக்கணமும் அதிற் சிறந்த திராவிடநல் திருநாடும்

தக்க சிறு பிறைநுதலும் தரித்தநறுந் திலகமுமே

அத்திலக வாசனைபோல் அனைத்துலகும் இன்பமுற

எத்திசையும் புகழ்மணக்க இருந்தபெருந் தமிழணங்கே    

உன் சீரிளமைத் திறம்வியந்து செயல்மறந்து வாழ்த்துதுமே!’’

இவ்வாறு இசைக்கேற்பப் பாடல் ஒழுங்குபடுத்தப்பட்டது.

மெல்லிசை மன்னர் எனப் போற்றப்படும் விசுவநாதன் இசையமைக்க – பின்னணி இசைப்புகழ் மணிகளான சவுந்திரராசன், திருமதி. சுசிலா ஆகியோர் பாடிய அந்த வாழ்த்து இசைத் தட்டுகளாக வெளியிடப்பட்டு, தமிழ்நாடு அரசு விழாக்களில் பயன்-படுத்தப்பட்டன.

அரசு விழாக்களில் தமிழ்த்தாய் வாழ்த்து என நான் அறிவித்தவுடனே அதற்கும் எதிர்ப்பு கிளம்பிடத் தவறவில்லை!

“ஆனந்த விகடன்’’ இதழில் கருத்துரை தீட்டிய பிரபல எழுத்தாளர் திரு.கி.வா. ஜெகந்நாதன் அவர்கள், தமிழ் ஒரு குட்டி தேவதை என்றும், மொழிவாழ்த்துப் பாடலைக் கடவுள் வாழ்த்துப் பாடலாக மாற்றியது பொருத்தமற்றது என்றும் அதற்குப் பதிலாக “அங்கிங் கெனாதபடி’’ எனத் தொடங்கும் தாயுமானவர் பாடலைப் பாடலாமென்றும் குறிப்பிட்டிருந்தார்.  ‘மெயில்’ போன்ற வேறு சில ஏடுகளிலும் மறுப்புக் கருத்துகள் வெளிவந்தன.

அப்போது பன்மொழிப்புலவர் கா.அப்பாத்துரையார் அவர்கள் தமிழ்நாடு அரசு எடுத்த முடிவை வரவேற்று விடுத்த அறிக்கையில், எதிர்க் கருத்தாளர்களுக்குத் தக்க பதில் அளித்திருந்தார். அந்த அறிக்கை மிக முக்கியமானது என்பதால் இங்கே அதனைக் குறிப்பிடுவது பயனுள்ள ஒன்றாகும்.

“தமிழ் இனத்தின் கடவுள் வணக்கப் பாடலாக பேராசிரியர் சுந்தரனாரின் “மனோன்மணீய’’ வணக்கப் பாடலையே பாட வேண்டுமென்ற கருத்து பல ஆண்டுகளுக்கு முன்பே தமிழ்நாட்டுப் புலவர் குழுவில் தீர்மானமாக வந்தது. அந்தப் பாடலில் சமஸ்கிருதத்தைவிட தமிழுக்கு உயர்வு கொடுக்கப்பட்டிருக்கிறது என்பதனால் சமஸ்கிருதப் பற்றாளர் சிலர் எதிர்த்தனர்.

புரட்சிக் கவிஞர் பாரதிதாசன் போன்றோர் புலவர் குழுவிலிருந்து விலகுவதற்கு இதுவே வழிவகுத்தது. தாயுமானவர் பாடலைப் பாடலாமென்றும் திருக்குறள் முதல் அதிகாரத்தைப் பாடலாமென்றும் இதன்பின் தீர்மானம் கொண்டு வரப்பட்டது. தாயுமானவர் பாடல், இந்து மதத்தைப் பெரிதும் சார்ந்தது எனப் பிறமதத்தினர் எதிர்த்தனர். திருக்குறள் முதல் அதிகாரத்துக்குக்கூட அது ”தாள்’’ “அடி’’ என்று கூறுவதால் உருவ வணக்கத்தின் சாயலுடையது என்று கிறித்துவ, இஸ்லாமியப் புலவர்கள் சிலர் குறைப்பட்டனர்.

மனோன்மணீயம் ஆசிரியர் சுந்தரம் பிள்ளையைவிட இந்து மதத்தைக் கரைத்துக் குடித்தவர், வேதாந்த ஆராய்ச்சியில், கடவுள் ஆராய்ச்சியில் கரைகண்டவர் மிகச் சிலரே இருக்க முடியும்.

அத்தகையவர் இந்து மதத்தையோ, வேறு எந்த மதத்தையோ புண்படுத்தாமல் எல்லா மதத்தினரும் ஒப்புக் கொள்ளத்தக்க விதத்தில் தமிழ் மொழி உருவாகவே பாடிய தேசியக் கடவுள் பாடல்தான் “நீராருங் கடலுடுத்த’’ என்ற பாடலாகும்.  அந்த வாழ்த்துப் பாடலைத் தமிழ்நாடு முதல்வர் கலைஞர் கருணாநிதி அவர்கள் தேர்ந்தெடுத்தார் என்றால், அது அவர் கலைப் பண்புக்கு, தமிழன்புக்கு சீரிய சான்றாகும்.’’

பன்மொழிப் புலவர் அப்பாத்துரையாரின் இந்தக் கருத்தினையொட்டி சிலம்புச் செல்வர் ம.பொ.சி. அவர்களும் அறிக்கையொன்றினை விடுத்தார்.

“நீராருங் கடலுடுத்த” – என்று தொடங்கும் பாடல் அரசு விழாக்களிலும், அமைச்சர்கள் கலந்துகொள்ளும் நிகழ்ச்சிகளிலும் பாடப்பட வேண்டுமென்று கலைஞர் கொடுத்த அறிவிப்பு, தமிழ் மொழிப் பற்றுடைய அனைவர்க்கும் கரும்பாக இனித்திடும்போது -ஏனோ ஆனந்த விகடனுக்கு மட்டும் வேம்பாகக் கசக்கிறது! அரசு விழாக்களில் தமிழைத் தெய்வமாக வழிபடுவோம் எனக் கலைஞர் கூறியிருக்கிறார்.

மொழியைத் தெய்வமாக வழிபடுவது பிழையெனில், இந்தப் பிழையை முதலில் செய்த பெருமை, வடமொழியாளர்க்கே உரிமை! மொழி வாழ்த்தையே கடவுள் வாழ்த்தாகப் பாடுவது பொருத்தமற்றது என்கிறார் கி.வா.ஜ.! “ஓம்” என்ற எழுத்து வடிவம்தான் ஒலி வடிவமாக _- இறை வடிவமாக _- பிரணவ மந்திரமாக வழிபடப்படுகிறது என்பதை அவர் மறந்தார் போலும்!’’

திரு. ம.பொ.சி. அவர்களைத் தொடர்ந்து தமிழ்அறிஞர் டாக்டர் மு.வரதராசனார் அவர்கள் “நாடும் மொழியும் ஒருங்கே போற்றப்படும் சிறப்புக்குரிய அந்தப் பாடல் தமிழ்நாட்டு மக்கள் ஏற்கத்தக்க வாழ்த்துப் பாடல்’’ என்று அறிவித்தார்.

தமிழ்த்தாய் வாழ்த்து இன்றைக்கு தமிழ்நாடு அரசு நிகழ்ச்சிகளில் பாடப்படும்பொழுது, அந்தப் பாடல் எத்துணை எதிர்ப்புகளைச் சமாளித்து வெளிவந்துள்ளது என்ற கடந்த காலச் சரித்திரம் பலருக்குத் தெரியாமலே கூட இருக்கலாம்; அதனால்தான் நினைவூட்டினேன்!

– கலைஞரின் ‘நெஞ்சுக்கு நீதி’ இரண்டாம் பாகம்

– ‘முரசொலி’, 21.12.2021 பக்.10)

.

திருவில்லிப்புத்தூர் அருகே பெருங்கற்காலத்தை சேர்ந்த இரும்பு உருக்காலை தடயம் கண்டுபிடிப்பு

   July 02, 2022 • Viduthalai

திருவில்லிபுத்தூர் அருகே, பெருங்கற்காலத்தை சேர்ந்த 4 ஆயிரம் ஆண்டுகள் பழைமையான இரும்பு உருக்காலையின் தடயத்தை ராமநாதபுரம் தொல்லியல் ஆய்வு நிறுவனத்தை சேர்ந்தவர்கள் கண்டுபிடித்துள்ளனர். விருதுநகர் மாவட்டம், திருவில்லிபுத்தூர் அருகே உள்ள வெங்கடேஸ்வரபுரம் கிராமத்தில் காவல்தோப்பு பேச்சியம்மன் கோயில் எதிரில் தொல்லியல் தடயங்கள் இருப்பதாக ராமநாதபுரம் தொல்லியல் ஆய்வு நிறுவனத்திற்கு தகவல் கிடைத்தது. இதனடிப்படையில் தொல்லியல் ஆய்வு நிறுவன தலைவர் ராஜகுரு, நூர்சாகிபுரம் சிவகுமார், ராமநாதபுரம் சேதுபதி அரசு கலைக்கல்லூரி முதுகலை தமிழ்த்துறை மாணவி சிவரஞ்சனி, திருப்புல்லாணி தொன்மை பாதுகாப்பு மன்ற மாணவர்கள் மனோஜ், பிரவீனா ஆகியோர் அப்பகுதியில் ஆய்வு செய்தனர்.

இந்த ஆய்வில், ஒரு ஏக்கர் பரப்பளவில் இரும்பு தாதுக்கள், இரும்பு கழிவுகள், கருப்பு, சிவப்பு நிற பானை ஓடுகள், கல் சுத்தியல்களின் உடைந்த பாகங்கள், சுடுமண் குழாய்கள், கல் குண்டு ஆகியவை சிதறிக் கிடப்பது கண்டறியப்பட்டது. இவை பெருங்கற்காலத்தை சேர்ந்த இரும்பு உருக்கு உலையின் தடயங்களாகும். இது குறித்து ராமநாதபுரம் தொல்லியல் ஆய்வு நிறுவன தலைவர் ராஜகுரு கூறுகையில், ‘‘பெருங்கற்காலத்தை சேர்ந்த மக்கள் இயற்கையாக கிடைக்கும் இரும்பு தாதுக்களை, உருக்காலைகள் மூலம் உருக்கி, இரும்பை பிரித்தெடுக்கும் தொழில்நுட்பத்தை அறிந்திருந்தனர். இரும்பை கொண்டு வலிமையான கத்தி, கோடாரி, ஈட்டி போன்ற ஆயுதங்களையும், வேளாண் கருவிகளையும் தயாரித்து பயன்படுத்தியுள்ளனர். இதனால் பெருங்கற்காலத்தை இரும்புக்காலம் எனவும் அழைப்பர்.

பெருங்கற்காலத்தின் பண்பாட்டு வளர்ச்சிக்கு இரும்பு கண்டுபிடிப்பு உறுதுணையாக இருந்துள்ளது. இப்பகுதியில் கண்டெடுக்கப்பட்ட கல் சுத்தியலின் மேற்பகுதியில் வட்டமாக பள்ளம் பதிக்கப்பட்டுள்ளது. இரும்பு தாதுவை கல் சுத்தியல் கொண்டு சிறிதாக உடைத்து, அவற்றை ஊது உலையிலிட்டு உருக்கி இரும்பை தனியாக பிரிக்க பயன்படுத்தியுள்ளனர். இரும்பு தாதுக்களை உருக்க, அதிக வெப்பம் தேவை என்பதால் ஊது உலையில் அதிக அழுத்தத்துடன் காற்றை செலுத்த சிறிய துளைகள் கொண்ட சுடுமண் குழாய்களும் பயன்படுத்தப்பட்டுள்ளன. இங்கு நீள்வட்ட வடிவிலான 2 சுடுமண் உலைக்களங்கள் புதைந்த நிலையில் உள்ளன. திருவில்லிபுத்தூர் அருகே உள்ள மேற்குத்தொடர்ச்சி மலையடிவாரத்தில் இரும்பு தாதுக்கள் கிடைக்கின்றன. இதனால் இப்பகுதிகளில் பெருங்கற்கால நினைவு சின்னங்களுடன் இரும்பு உருக்காலையின் தடயங்கள் காணப்படுகின்றன.

தமிழர்களின் இரும்புக்காலம்

   July 02, 2022 • Viduthalai

தமிழகத்தின் இரும்புக்காலம் பொது வாகவே அறிஞர்களால் கிமு. 500 என்றே நிறுவப்பட்டு வந்தது. ஆனால் ஆதிச்ச நல்லூர் அகழ்வாய்வுகள் விரைவு பெற்ற காலம் அதை இன்னும் 1500 ஆண்டுகள் பழைமை வாய்ந்ததாக நிறுவியது. இதற்கு முன்னரே செம்பு, இரும்பு, தங்கம் போன்ற உலோகங்கள் இங்கு உபயோகப்படுத்தப் பட்டுள்ளது எனத் தெரிய வந்தது

வட ஒன்றிய தமிழ்நாட்டின் பகுதிகளில் நடந்த அகழாய்வில் தமிழர்கள் 4200 ஆண்டுகளுக்கு முன்பே  இரும்பு பயன் படுத்தியுள்ளனர் என்று புதிய  பகுப்பாய் வில் தெரியவந்துள்ளது

தமிழ்நாட்டில் அகழ்வாராய்ச்சி செய்யப்பட்ட கண்டுபிடிப்புகளின் கார்பன் டேட்டிங் 4,200 ஆண்டுகளுக்கு முன்பு இந்தியாவில் இரும்பு பயன்படுத்தப்பட்ட தற்கான ஆதாரங்களை தெரிவிப்பதாக, தொல்லியல் துறை அறிக்கையின் அடிப் படையில் தமிழ்நாடு அரசு அறிவித்தது.

இதற்கு முன், இரும்பு உபயோகத்தின் ஆரம்ப சான்றுகள் நாட்டை பொறுத்த வரையில் கி.மு. 1900-2000 வரையிலும், தமிழ்நாட்டிற்கு கி.மு. 1500 வரையிலும் இருந்தன. ஆனால், சமீபத்திய சான்றுகள்’ தமிழ்நாட்டில் இரும்பு பயன்பாடு’  கிமு 2172 க்கு முந்தையவை என்பதை காட்டுகிறது.

4,200 ஆண்டுகளுக்கு முன் வாழ்ந்த தமிழர்கள் இரும்பு பற்றி அறிந்தவர்கள் என்பது உறுதியாகி உள்ளது என சட்டப் பேரவையில் முதல்வர் மு.க.ஸ்டாலின் தெரிவித்தார். “இரும்பின் பயன்பாட்டை மனிதகுலம் உணரத் தொடங்கிய பின்னரே அடர்ந்த காடுகள் வளமான நிலங்களாக மாற்றப்பட்டன. தமிழகத்தில் விவசாய பணிகள் தொடங்கியது தொடர்பான கேள்விகளுக்கு இந்த கண்டுபிடிப்பு பதில் அளித்துள்ளது” என்று ஸ்டாலின் கூறினார்.

கண்டுபிடிப்புகள்

பெங்களூரில் இருந்து சுமார் 100 கிமீ தெற்கில் உள்ள தமிழ்நாட்டின் கிருஷ்ண கிரிக்கு அருகில் உள்ள மயிலாடும்பாறையில் அகழ்வாராய்ச்சிகள் நடத்தப்பட்டது. மயி லாடும்பாறை என்பது நுண்கற்காலம் (கிமு 30,000) மற்றும் ஆரம்பகால வரலாற்று (கிமு 600) காலங்களுக்கு இடைப்பட்ட பழங்கால கலாச்சாரப் பொருட்களைக் கொண்ட ஒரு முக்கியமான தளமாகும்.

“தொகரப்பள்ளி, கங்காவரம், சந்தூர், வேடர்தட்டக்கல், குட்டூர், கிட்லூர், சப்ப முட்லு மற்றும் கப்பலவாடி போன்ற பல தொல்பொருள் இடங்களுக்கு மத்தியில் இந்த தளம் அமைந்துள்ளது. இந்த முக்கியமான தொல்பொருள் இடங்கள் அனைத்தும் 10 கிமீ தொலைவில் உள்ளன.

மயிலாடும்பாறை என்ற தலைப்பில் ஸ்டாலின் வெளியிட்டுள்ள அறிக்கையில் கூறியிருப்பதாவது:

பேராசிரியர் ராஜன் இந்த இடத்தை 1990 களில் கண்டுபிடித்தார், மேலும் அங்கிருந்து முதல் அகழ்வாராய்ச்சி 1990 களில் செய் யப்பட்டது. அலரேட்டர் மாஸ் ஸ்பெக்ட் ரோஸ்கோபியைப் (accelerator mass spectroscopy) பயன்படுத்திய டேட்டிங் முடிவுகள் கடந்த வாரம் வந்தன.

காலவரிசை மறுபரிசீலனை செய்யப்பட்டது

மனிதர்கள் இரும்புக் காலத்தில் நுழைந்த தேதிகள் உலகின் ஒரு பகுதி யிலிருந்து மற்றொரு பகுதிக்கு மாறுபடும். இந்தியாவிலும், பல தசாப்தங்களாக தொடர்ச்சியான கண்டுபிடிப்புகளுடன் தேதி திருத்தப்பட்டுள்ளது.

1979 ஆம் ஆண்டில், ராஜஸ்தானில் உள்ள அஹார் என்ற இடத்தில், கிமு 1300 இல் இரும்பின் பயன்பாடு கண்டுபிடிக்கப் பட்டது. பின்னர், கருநாடகாவில் உள்ள புக்காசாகராவில் இரும்பு உற்பத்தியைக் குறிக்கும் மாதிரிகள்’ கிமு 1530 க்கு முந்தை யவை என்பது தெரியவந்தது.

ஒன்றிய கங்கை பள்ளத்தாக்கில் உள்ள ராய்புராவில் நடத்தப்பட்ட அகழ்வாராய்ச் சியில் இரும்பு உருகியதற்கான சான்றுகள் கிடைத்தன. இதனால் இந்த தேதி பின்னர் 1700-1800  BCEக்கு தள்ளப்பட்டது,

பின்னர் வாரணாசிக்கு அருகிலுள்ள மல்ஹர் மற்றும் வட கருநாடகாவில் உள்ள பிரம்மகிரி ஆகிய இடங்களில் ஆய்வுகள் அடிப்படையில், இந்தியாவில் கி.மு. 1900-2000 ஆண்டுகளுக்கு முன்பு இரும்பு பயன் படுத்தியதற்கான சான்றுகள் இருந்தது கண்டுபிடிக்கப்பட்டது. இந்தியாவின் பல் வேறு பகுதிகளில் இருந்து கண்டுபிடிக்கப் பட்ட டேட்டிங் முடிவுகள், கி.மு. 1800 ஆண்டுகளுக்கு முன்னாடியே,  இரும்பு-தாது தொழில்நுட்பத்தின் ஆதாரங்களைக் காட்டுகின்றன. சமீபத்திய கண்டுபிடிப்புக்கு முன், தமிழ்நாட்டின் இரும்பு உபயோகத்திற் கான ஆரம்ப சான்றுகள் மேட்டூருக்கு அருகிலுள்ள தெலுங்கனூர் மற்றும் மாங் காடு ஆகிய இடங்களில் கிடைத்தன, இது கிமு 1500 க்கு முந்தையது.

வரலாற்று முக்கியத்துவம்

இந்தியாவில் தாமிரத்தின் பயன்பாடு தோன்றியதாகக் கூறப்படும் சிந்து சம வெளியில் இரும்பு பயன்படுத்தப்பட்டதாகத் தெரியவில்லை (கிமு 1500). அதேநேரம் செம்பு கிடைக்காத மற்ற பகுதிகள் கற்காலத் தில் இருக்க வேண்டிய கட்டாயம் ஏற்பட் டது. இரும்புத் தொழில்நுட்பம் கண்டுபிடிக் கப்பட்டபோது, ​​அது விவசாயக் கருவிகள் மற்றும் ஆயுதங்களின் உற்பத்திக்கு வழி வகுத்தது, இது பொருளாதார மற்றும் கலாச் சார முன்னேற்றத்திற்கு முன்னால் ஒரு நாகரிகத்திற்குத் தேவையான உற்பத்திக்கு வழிவகுத்தது என்று மயிலாடும்பாறை அகழ் வாராய்ச்சியுடன் தொடர்புடைய முன்னணி விஞ்ஞானி ஒருவர் கூறினார்.

பயனுள்ள கருவிகள் தாமிரத்தால் செய் யப்பட்டிருந்தாலும், இவை உடையக்கூடி யவை மற்றும்  இரும்புக் கருவிகளைப் போல வலுவாக இல்லை. அடர்ந்த காடு களை அழிக்கவும், நிலத்தை விவசாயத்தின் கீழ் கொண்டு வரவும் செப்புக் கருவிகளைப் பயன்படுத்துவது கடினமாக இருந்திருக்கும் -அதனால்தான்  மனிதர்கள் இரும்பை பயன்படுத்தத் தொடங்கிய பின்னரே காட ழிப்பு நடந்ததாக  விஞ்ஞானிகள் ஊகிக் கிறார்கள்.

நமது இரும்புக் காலம் கிமு 1500 முதல் கிமு 2000 வரையிலான என்பதற்கான சமீபத்திய சான்றுகளைக் கொண்டு, நமது கலாச்சார விதைகள் கிமு 2000 இல் போடப் பட்டது என்று நாம் கருதலாம். மேலும் இரும்புத் தொழில்நுட்பத்தால் தூண்டப் பட்ட சமூக-பொருளாதார மாற்றங்கள் மற்றும் பாரிய உற்பத்தியின் பலன் அதன் முதல் பலனை கிமு 600 இல் கொடுத்தது - தமிழ் பிராமி எழுத்துக்கள்,” என்று விஞ்ஞானி கூறினார்.

கலாச்சாரம் மற்றும் அரசியல்

தமிழ் பிராமி எழுத்துக்கள் கிமு 300 இல் தோன்றியதாக நம்பப்பட்டது, ஆனால் 2019 இல் ஒரு முக்கிய கண்டுபிடிப்பு கிமு 600 க்கு அதைத் தள்ளியது.

இந்த டேட்டிங் சிந்து சமவெளி நாகரி கத்திற்கும்  தமிழ்நாடு/தென்னிந்தியாவின் சங்க காலத்திற்கும் இடையே உள்ள இடை வெளியைக் குறைத்தது. இதுவும், சமீபத்திய கண்டுபிடிப்புகளும் அரசியல் முக்கியத் துவம் வாய்ந்தவை.

மதுரைக்கு அருகில் உள்ள கீழடி உள்ளிட்ட இடங்களில் மேற்கொள்ளப்பட்ட அகழ்வாராய்ச்சிகளின் அடிப்படையில் எழுத்துகளின் காலக்கணிப்பு, இந்திய தொல்லியல் துறை (ASI)  மேம்பட்ட கார் பன் டேட்டிங் சோதனைகளுக்கு செல்லாத தால் சர்ச்சைக்குள்ளானது, மேலும் ஆய் வைத் தொடங்கிய இந்திய தொல்லியல் துறை ஆராய்ச்சியாளர் மாநிலத்திற்கு வெளியே மாற்றப்பட்டார். பிறகு 2019இல் கண்டுபிடிப்புகள் மாநில அரசாங்கத்தின் முயற்சிகளில் இருந்து வெளிவந்தன.

இந்திய வரலாற்றை தமிழர் மண்ணில் இருந்து மாற்றி எழுத வேண்டும் என்பதை அறிவியல் முறைகள் மூலம் நிலைநாட்டு வதே மாநில அரசின் இலக்கு என்று சட்டப் பேரவையில் முதலமைச்சர் மு.க.ஸ்டாலின் கூறினார். கீழடியில் காணப்படும் கிராஃபிட்டி மற்றும் சிந்து சமவெளி நாகரிகத்தின் அடை யாளங்களை ஒப்பிட்டு ஆய்வு செய்யும் பணியை மாநில தொல்லியல் துறை தொடங்கும் என்றார்.

தமிழ்நாட்டின் தொல்லியல் துறை கண்டுபிடிப்புகள் கொந்தகை தளத்தில் முதுமக்கள் தாழிகள்

  May 17, 2022 • Viduthalai

 சிவகங்கை, மே 17- கீழடி 8ஆம் கட்ட அகழாய்வில் கொந்தகை தளத்தில் இடைவெளியின்றி முது மக்கள் தாழிகள் நெருக்கமாக கிடைத்திருப்பது ஆய்வாளர்களை வியப்பில் ஆழ்த்தியுள்ளது. கீழடியில் பிப்ரவரி 13ஆம் தேதியும், அகரம், கொந்தகையில் மார்ச் 30ஆம் தேதியும் அகழாய்வு பணிகள் தொடங்கின. தொல்லியல்துறை இயக்குநர் சிவானந்தம் தலைமையில் அகழாய்வு பணிகள் நடைபெற்று வருகின்றன.

கொந்தகை தளத்தில் 7ஆம் கட்ட அகழாய்வின் போது, 9 குழிகள் தோண்டப்பட்டு, 30 முதுமக்கள் தாழிகள் கண்டறியப்பட்டன. 7ஆம் கட்ட அகழாய்வில் கிடைத்த தாழிகள் இடைவெளியுடன் இருந்ததால் முழுமையாகவும், சேதமடையாமலும் இருந்தன.

தாழிகளினுள் உள்ள சுடுமண் பாத்திரங்களும் உருகுலையாமல் கிடைத்தன. 8ஆம் கட்ட அகழாய்வில் இதுபோன்ற இடைவெளியில்லை. நெருக்கமாகவும், தாழிகள் அனைத்தும் சேத மடைந்தும் உள்ளன. இதனால் 2 கட்ட அகழாய் விலும் கிடைத்த தாழிகளுக்குள் காலஇடைவெளி அதிகமாக இருக்கக்கூடும் என ஆய்வாளர்கள் கருதுகின்றனர். அத்துடன் இடைவெளி இன்றி தாழிகள் புதைக்கப்பட்டதற்கான காரணத்தையும் ஆய்வு செய்ய உள்ளனர். தற்போது தாழிகளுக்கு இடையே உள்ள தூரத்தை அளவிட்டு பதிவு செய்து வருகின்றனர். அதன்பின் தாழிகளினுள் உள்ள பொருட்களை வெளியே எடுக்கும் பணி தொடங்கும் என்று தெரிகிறது. 

சிவகங்கை அருகே பிஜப்பூர் சுல்தான்கள் காலத்திய நாணயங்கள்

சிவகங்கை அருகே அரசனேரி கீழமேடு பேச்சிக்குளம் முனிக்கோவில் பகுதியில் வித்தி யாசமான மூன்று உலோகச் சில்லுகள் கிடைத்தன. இவை செம்பால் செய்யப்பட்டதாக இருந்தாலும் முன்னும் பின்னுமாக அடையாளங்கள் இருந்தன. இதிலுள்ள வேறுபட்ட எழுத்து வடிவத்தை கொண்டு நாணயங்கள் என்பதை உறுதி செய்ய முடிந்தது. இவற்றை ஆய்வு செய்ததில் இவை பிஜப்பூர் சுல்தான்கள் காலத்தவை என்பதை உறுதி செய்ய முடிந்தது.

கர்நாடக மாநிலத்தில் உள்ள பிஜப்பூரைத் தலைநகராகக் கொண்டு வடக்கு கர்நாடகா பகுதியையும் தெற்கு மகாராட்டிரப் பகுதியையும் 1490லிருந்து 1686 வரை ஆண்டவர்கள் பிஜப்பூர் சுல்தான்கள். 1490இல் பாமினி  சுல்தான்களிடம் இருந்து தன்னை விடுவித்துக் கொண்டு தனியரசாக செயல்பட்டது. யூசுப் அடில் ஷா தொடங்கி 9 அரசர்கள் இப்பகுதியை ஆட்சி செய்தனர். இங்கு கிடைத்த நாணயங்கள் செம்பால் ஆனதோடு அதிக எடை உள்ளதாக உள்ளன. ஒரு நாணயத்தில் தேவநாகரி எழுத்தில் ராஜா என்று எழுதப் பட்டுள்ளது. மற்ற எழுத்துக்கள் பாரசீகத்தில் எழு தப்பட்டுள்ளன.

இவை இப்பகுதி ஆளுகையில் இருந்த மன்னர் களின் நிர்வாகத்திற்கு தொடர்பற்று இருப்பதால் இது வணிகத் தொடர்பிலோ அல்லது இறைவழிப் பயணத்தின் வழியோ வந்திருக்கலாம். மதுரை, தஞ்சாவூர், கரூர், திருநெல்வேலி போன்ற பகுதிகளில் ஆண்டாண்டு காலமாய் வெள்ளப்பெருக்கு ஏற்பட்டு ஆற்றில் நாணயங்கள் இழுத்து வரப்படு வதும் அவற்றை அரித்து சலித்து எடுப்பதும் பல காலங்களாக தொழிலாகவே நடைபெற்று வந்து உள்ளன. ஆனால் சிவகங்கை போன்ற பகுதிகளில் இவ்வாறான நாணயங்கள் கிடைப்பது அரிது.இவ்வாறு தெரிவித்தனர்.

வெம்பக்கோட்டை அகழாய்வில் தந்தத்தாலான அணிகலன்

வெம்பக்கோட்டையில் நடைபெற்று வரும் அகழாய்வில் யானை தந்தத்தால் ஆன அழகிய வேலைப்பாடுகளுடன் கூடிய அணிகலன் மற்றும் சுடுமண்ணால் ஆன தொங்கட்டான் கண்டறியப் பட்டுள்ளது. 

வெம்பக்கோட்டை அருகே வைப்பாற்றின் வடகரையில் அமைந்துள்ள உச்சிமேட்டில் 25 ஏக்கர் பரப்பளவிலான தொல்லியல் மேட்டில் கடந்த மார்ச் 16-ஆம் தேதி முதல் அகழாய்வுப் பணிகள் நடைபெற்று வருகின்றன.  முன்னதாக, அகழாய்வில் சுடுமண்ணால் ஆன பகடைக்காய், தக்களி, ஆட்டக்காய்கள், முத்து மணிகள், சங்கு வளையல்கள், சுடு மண்ணால் செய்யப்பட்ட விளையாட்டுப் பொருள்கள், அழகிய வேலைப் பாடுகளுடன் கூடிய சுடு மண் அகல்விளக்கு கண்டறியப்பட்டன.  இந்நிலையில், ஞாயிறன்று அழகிய வேலைப்பாடுகளுடன் கூடிய யானை தந்தத்தால் செய்யப்பட்ட அணிகலன் மற்றும் சுடுமண்ணால் ஆன தொங்கட்டான் ஆகிய அணிகலன்கள் கண்டறியப்பட்டுள்ளன.  யானை தந்தத்தால் செய்யப்பட்ட அணிகலன் 5 சென்டி மீட்டர் நீளமும், 0.8 சென்டிமீட்டர் விட்டமும், 61 கிராம் எடையும் சுடுமண் தொங்கட்டான் 2.2 சென்டிமீட்டர் நீளமும், 1.01 சுற்றளவும் 65 கிராம் எடையும் கொண்டதாக உள்ளன.

அண்ணல் அம்பேத்கர் பிறந்த நாளை 'சமத்துவ நாளாக'க் கொண்டாடிட தமிழ்நாடு அரசு அறிவிப்பு

  April 14, 2022 • Viduthalai

 தமிழ் வருஷப் பிறப்பு என்ற பெயரில் தேநீர் விருந்து உபச்சாரம் தடபுடல் ஏன்?

தமிழ்ப் பெருமக்களே, இந்தப் பனிப்போர் மூட்டத்தைப் புரிந்துகொள்ளுங்கள்!

அண்ணல் அம்பேத்கர் பிறந்த நாளை சமத்துவ நாளாகக் கொண்டாடிட அரசு அறிவிப்பு - தமிழ் வருஷப் பிறப்புக்குத் தேநீர் விருந்து உபச்சாரம் தடபுடல் ஏன்? தமிழ்ப் பெருமக்களே, இந்தப் பனிப்போர் மூட்டத்தைப் புரிந்துகொள்ளுங்கள் என்று திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார்.

 அவரது அறிக்கை வருமாறு.

இன்று (14.4.2022) - தமிழ் வருஷப் பிறப்பாம்!

இந்த வருஷத்திற்கு - அது ஆண்டு அல்ல - பெயரே வடமொழி, ஆரிய, சமஸ்கிருதச் சொல், ‘சுபகிருது' வருஷமாம்!

‘‘தமிழ்(?) வருஷப் பிறப்புக்கான புராணக் கதை - அதன் மூலம்  (Origin)  தெரியுமா?

இதோ ‘அபிதான சிந்தாமணி' என்ற அக்கால தமிழ்க் கலைக்களஞ்சியத்தினைப் பாருங்கள்:

‘‘வருஷம் ஒரு முறை நாரத முனிவர் கிருஷ்ணமூர்த் தியை நீர் அறுபதினாயிரம் கோபிகைகளுடன் கூடி இருக் கிறீரே எனக்கு ஒரு கன்னிகை தரலாகாதா என்று கேட்க,

அதற்குக் கண்ணன் நான் இல்லாப் பெண்ணை வரிக்க என் உடன்பட்டுத்தான் (60,000) வீடுகளிலும் பார்த்து, கண்ணன் இல்லா வீடு கிடைக்காததினால், கண் ணனிடம் வந்து அவர் திருமேனியில் மய்யல் கொண்டு, அவரை நோக்கி நான் தேவரீரிடம் பெண் ணாய் இருந்து ரமிக்க எண்ணங் கொண்டேன் என்றனர்.

கண்ணன் யமுனையில் நாரதரை ஸ்நானஞ் செய்ய ஏவ, முனிவர் அவ்வகை செய்து ஒரு அழகுள்ள பெண்ணாயினர்.

இவளுடன் (நாரத முனிவர்) கண்ணன் அறுபது வருஷம் கிரீடித்து அறுபது குமாரரைப் பெற்றனர். அவர்கள் பெயர் பிரபவ முதல் அக்ஷய இறுதியான வர்களாம். இவர்கள் வருஷமாம் பதம் பெற்றனர்.

பிரபவ, விபவ, சுக்கில, பிரமோதூத, பிரசோத்பத்தி, ஆங்கீரச, ஸ்ரீமுக, பவ, யுவ, தாது, ஈசுவர, வெகுதானிய, பிரமாதி, விக்ரம, விஷு, சித்திரபானு, சுபானு, தாரண, பார்த்திப, விய இவ்விருபதும் உத்தம வருஷங்கள்.

சர்வஜித்த, சர்வதாரி, விரோதி, விகிர்தி, கர, நந்தன, விஜய, ஜய, மன்மத, துன்முகி, ஏவிளம்பி, விளம்பி, விகாரி, சார்வரி, பிலவ, சுபகிருது, சோபகிருது, குரோதி, விஸ்வாவசு, பராபவ இவ்விருபதும் மத்திம வரு ஷங்கள்,

பிலவங்க, கீலக, சவுமிய, சாதாரண, விரோதி கிருது, பரிதாபி, பிரமாதீச, ஆனந்த, இராக்ஷஸ, நள, பீங்கள, காளயுக்தி, சித்தார்த்தி, ரவுத்ரி, துன்மதி, துந்துபி, உருத்ரோத்காரி, இரத்தாக்ஷி, குரோதன், அக்ஷய இவ்விருபதும் அதம வருடங்களாம்.''

(ஆண் கடவுள் கிருஷ்ணனுக்கும், ஆண் முனிவர் நாரதருக்கும் பிறந்த அறுபது பிள்ளைகளின் பெயர் தான் இவை.)

(ஆதாரம்: ‘அபிதான சிந்தாமணி' பக்கம் 1392).

‘‘தமிழ்'' வருஷங்கள் மொத்தம் 60 தானாம்! அவை யாவையும் கிருஷ்ணனும், நாரதரும் பெற்றெடுத்த பிள்ளைகளாம்!

60 வருஷங்களுக்குமேல் வாழ்பவர்கள் வயது கணக் கிலும் பல ஆண்டுகளுக்குப் பின் குழப்பமே மிஞ்சும்.

தமிழ் வருஷப் பிறப்பு என்பது சித்திரை அல்ல - புரட்சிக்கவிஞர் இடித்துச் சொன்னார்.

“நித்திரையில் இருக்கும் தமிழா

சித்திரை அல்ல உனக்குத் தமிழ்ப் புத்தாண்டு

அண்டிப் பிழைக்க வந்த ஆரியர் கூட்டம் காட்டியதே

அறிவுக்கு ஒவ்வாத அறுபது ஆண்டுகள்

தரணி ஆண்ட தமிழருக்கு

தை முதல் நாளே தமிழ்ப் புத்தாண்டு!”

பண்பாட்டுப் படையெடுப்பினால் ஏற்பட்ட விளைவு இது!

இந்த ‘வருஷம்' இந்தப் பண்பாட்டுப் படையெடுப்புக்குப் புத்தாக்கம் தரும் வகையில் - இதற்குமுன் எப்போதும் இல்லாத கொண்டாட்டம் ஆளுநர் மாளிகையில் - ராஜ் பவனில்! அழைப்பிதழ் அனுப்பிக் கொண்டாடும் சனாதன மீட்டுருவாக்க பண்டிகைக் கொண்டாட்டமா?

செம்மொழி தமிழுக்குக் காட்டாத ஆர்வம், ‘‘தமிழ் வருஷப் பிறப்பு'' என்று கூறி, தேநீர் விருந்து உபச்சாரம் தடபுடல் ஏன்?

ஆரிய மாயை அங்கே ஆட்சி செலுத்தும் இப்போதைய நிலையால்!

மக்களால் தேர்ந்தெடுக்கப்பட்ட ஒரு முதலமைச்சர்; அவரது ஆட்சி அண்ணல் அம்பேத்கர் பிறந்த நாளை சமத்துவ நாளாகக் கொண்டாடிட அரசு அறிவிப்பு - உறுதிமொழி ஏற்பு.

ஆனால், அதே நாளில், அங்கே சனாதனச் சங்கமம்!

இரண்டு பண்பாட்டுக் கத்திகள் ஒரே உறையில்.

தமிழ்ப் பெருமக்களே, இந்தப் பனிப்போர் மூட்டத்தைப் புரிந்துகொள்ளுங்கள்!

 கி.வீரமணி

தலைவர்,

திராவிடர் கழகம் 

சென்னை       

14.4.2022            

உலகின் சிறந்த அறிவியல் ஆய்வாளர்கள் பட்டியலில் தமிழர்கள் அதிகம்

    November 10, 2021 • Viduthalai

 ஸ்டாம்பர்ட்(அமெரிக்கா) நவ.10 அமெரிக்க ஸ்டாம்பர்ட் பல்கலைக் கழகம் வெளியிட்டுள்ள உலகின் சிறந்த அறிவியல் ஆய்வாளர்கள் பட்டியலில் தமிழ்நாட்டைச் சேர்ந்த 100க்கும் அதிகமானோர் உள்ளனர்.

உலகின் மிகச் சிறந்த அறிவியல் ஆய்வாளர்கள் பட்டியலை அமெ ரிக்காவின் புகழ்பெற்ற ஸ்டாம்பர்ட் பல்கலைக்கழகம் வெளியிட்டுள் ளது.   அதில் 1,86,177 விஞ்ஞானிகள் இடம் பெற்றுள்ளனர்.  இவர்களில் 2042 பேர் இந்தியாவைச் சேர்ந்த வர்கள் ஆவார். இந்த இந்தியர்களில் 100க்கும் அதிகமானோர் தமிழ் நாட்டை சேர்ந்தவர்கள் என்பது குறிப்பிடத்தக்கதாகும்.

இந்த பட்டியலில், பெரும்பாலும் வேதியியல், நானோ அறிவியல்,  இயந்திரவியல், மெட்டிரியல் சைன்ஸ்,   உயிர் தகவ லியல், ஆட்டோ மேஷன், எனர்ஜி, புவியியல், சுற்றுச் சூழல் அறிவியல் ஆகிய படிப்புகளில் நிபுணர்கள் தான் இடம் பெற்றுள்ளனர்.

சென்னை நீரிழிவு ஆராய்ச்சி அறக்கட்டளையைச் சேர்ந்த டாக்டர் வி மோகன், தரவரிசை பட்டி யலில் 8,741 இடத்தை பிடித்து அசத்தியுள்ளார்.  அண்ணா பல்கலைக்  கழகத்தின் துணைவேந்தர் ஆர்.வேல்ராஜ் உட்பட மூன்று பேராசிரியர்கள் பட்டியலில் இடம் பெற்றுள்ளனர்.

இது குறித்துப் பேசிய வேல்ராஜ், உலகின் சிறந்த அறிவியல் ஆய்வா ளர்கள் சமீபத்திய பட்டியலில் தமிழ்நாட்டில் உள்ள பல்வேறு துறைகளில் சுமார் 150 பேராசி ரியர்கள் இடம்பெற்றுள்ளனர். இந்தப் பட்டியலில் நான் இடம் பிடித்ததில் மகிழ்ச்சி அடை கிறேன் என்றார். ஸ்டான்போர்ட் பல் கலைக் கழகம் பிரத்தியேகமாக 2020 ஆம் ஆண்டில் ஏற்பட்ட தாக்கத்தை மட்டும் மதிப்பீட்டு இரண்டாவது பட்டியலை வெளியிட்டது.

அதில், அண்ணா பல்கலைக் கழகத்தைச் சேர்ந்த 13 பேராசிரியர்கள் இடம் பிடித்தனர். 

புவியியல் துறையைச் சேர்ந்த பேராசிரியர் எல் இளங்கோ ஹைட் ரஜியாலஜியில் முதலிடத் தைப் பிடித்தார். அவர் கூறுகையில், தனது பிஎச்டி மாணவர்களின் கடின உழைப்பால் உயர் தரவரிசை சாத்திய மானது என்றார். மாநிலப் பல்கலைக் கழகங்களில், பாரதியார் பல்கலைக் கழகம் மற்றும் அண்ணாமலைப் பல்கலைக்கழகத் தில் தலா ஒன்பது பேரும், அழகப்பா பல்கலைக்கழகத் தில் 4 பேரும், பாரதிதாசன் பல் கலைக் கழகத்தில் 3 பேரும், மதுரை காமராஜர் பல் கலைக்கழகம் மற்றும் மனோன் மணீயம் சுந்தரனார் பல்கலைக் கழகம் தலா இரண்டு பேரும் இடம் பெற்றுள்ளனர்.

தனியார் நிறுவனங் களில், வேலூர் இன்ஸ்டிடியூட் ஆப் டெக் னாலஜி (விஅய்டி) பட்டியலில் 14 பேரும், கிறிஸ்டியன் மருத்துவக் கல்லூரியில் 10 பேரும், எஸ்ஆர்எமில் நான்கு பேரும், அமிர்தா ஸ்கூல் ஆஃப் இன்ஜினியரிங் மற்றும் பிஎஸ்ஜி காலேஜ் ஆஃப் டெக்னால ஜியில் இருந்து தலா இரண்டு பேரும் இடம் பெற்றுள்ளனர்.

திருக்குறள் குறித்த தந்தை பெரியாரின் கருத்துகள்

   January 13, 2022 • Viduthalai

திருவள்ளுவர் மக்களுடைய நடப்புக்கு ஆன கொள்கைகளை விளக்கினார். புத்தர் மக்களின் எண்ணத்துக்கு உள்ளத்துக்கு கொள்கைகளையும் முறைகளையும் வகுத்துத் தந்தார். (7.2.1954)

அறிவால் உய்த்துணர்ந்து ஒப்புக் கொள் ளக் கூடியனவும் இயற்கையோடு விஞ்ஞானத்துக்கு ஒப்ப இயைந்திருக்கக் கூடியன வும் ஆன கருத்துக்களையே கொண்டு இயங் குகிறது வள்ளுவர் குறள். (குடிஅரசு 13.11.1948)

குறள் ஒரு அறிவுக் களஞ்சியம். பகுத் தறிவு மணிகளால் கோர்க்கப்பட்ட நூல் திருக் குறள்.  (விடுதலை 1.12.1955)

குறள் ஒரு இலக்கியம் அல்ல. அது காலத்துக்கு ஏற்ற அறிவு அல்லது ஒழுக்க நூல் என்று சொல்லலாம். (விடுதலை 1.10.1957)

நம் நாட்டினருக்கு என்ன கலை, என்ன குறிக்கோள், என்ன நாகரிகம் என்று கேட்டால் அதற்கு ஆதாரமாகத் திருவள்ளுவர் இயற்றிய திருக்குறள் ஒன்றைத்தான் எடுத்துக் காட்ட முடியும். (விடுதலை 3.10.1958)

நமது இலக்கியக் கர்த்தாக்களில் எவரும் குறளாசிரியரைத் தவிர மற்றவர் எவரும் மனிதச் சமுதாய வளர்ச்சியை முன் வைத்து இலக்கியம் செய்யவே இல்லை. (விடுதலை 7.1.1965)

திருவள்ளுவர் நல்ல அறிவாளி, ஆராய்ச் சியாளர் அந்தக் காலத்தில் மக்களிடம் பரவி இருந்த மூட எண்ணங்களோடு போராடிய அறிஞர் என்ற அளவில்தான் ஒத்துக் கொள்ள முடியும்? விடுதலை 30.5.50 புத்த ருக்கு அடுத்தபடி வள்ளுவர் தோன்றி, பிறப் பினால் பேதம் கிடையாது; எதையும் அறி வைக் கொண்டு சிந்தித்து அதன்படி நட என அருமையான கருத்துகளை எல்லாம் தமது நூலாகிய திருக்குறளில் கூறிச் சென்றார். ஆனால் அவற்றைப் பார்ப்பனர்கள் குப்பைத் தொட்டியில் போகும்படி செய்துவிட்டார்கள். (விடுதலை, 6.4.1959)

விதி என்பதையும் நன்றாக விளக்கிக் காட்டியிருக்கிறார். உன் அறிவைக் கொண்டு உன் முயற்சியின்படி நட! மக்களுக்கு நன்மை செய்! அறத்தை வளர்க்க! என்று கூறியிருக்கிறாரேயன்றி, உன் விதிப்படி - கடவுள் இஷ்டப்படி நீ நட ! என்பதாக எந்த இடத் திலும் கூறவே இல்லை. குறளில் ஊழ் என்ற தலைப்புக்கு பொருள் கூறவந்த புலவர்கள் அவரின் கருத்துக்கு மாறுபாடாகவே கூறியிருக்கிறார்கள். மனிதனுடைய சரீர அமைப் பின் பயனாய் ஏற்படும் சில தனிப்பட்ட குணங்களுக்குத்தான். ஊழ் என்ற பெயரை அவர் கொடுத்திருக்கிறார். ஊழ் என்பது பிற விக்குணம், இயற்கைக்குணம், மனித சுபாவத் தின் தனிப்பட்ட குணம் என்கிற கருத்துக்களே யாகும். குடிஅரசு 7.5.1949 திருவள்ளுவர் படத்தைத் திறந்து வைப்பதாயிருந்தால், முத லில் கம்பனுடைய படம் ஒன்றைக் கொளுத் திச் சாம்பலாக்கிவிட்டு, பிறகுதான் திருவள் ளுவரைப்பற்றி  பேசத் துவங்கவேண்டும்.  (குடிஅரசு, 13.11. 1948)

திருவள்ளுவருடைய கொள்கைகளை யும், அவருடைய பாட்டின் அருமையையும், அவற்றால் திராவிட நாடு பெற்றிருக்க வேண்டிய பலனையும் கம்பனது ராமாயணம் அடியோடு கெடுத்துவிட்டது. பார்ப்பன சூழ்ச்சிக்குப் பலியான  கம்பனால், இந்நாட்டில் நிலவியிருந்த திராவிடக் கலாச்சாரமே பாழாக்கப்பட்டுப் போய்விட்டது. ஆரியப் பண்புகளையும், ஆரிய நடைமுறைகளையும்  போற்றிப் புகழ்ந்து, அவற்றை திராவிட மக் கள் ஏற்கும்படி அழகுறத் தமிழில் பாடி மக்களை ஏய்த்துவிட்டான் கம்பன். (குடிஅரசு 13.11. 1948)

திருவள்ளுவர் குறளோ ஆரியத்தை, ஆரிய தர்மத்தை  அப்படியே மறுக்க எழுதப் பட்ட நூலாகக் காணப்படுகிறது. கடவுள் வாழ்த்தில் கூட  வள்ளுவர் ஒழுக்கத்தையும், அறிவையும், பற்றற்ற தன்மையையும்தான்  கடவுளாகக் காட்டியுள்ளார். கடவுளை அறி ஞன் என்றார். பிறப்பு, இறப்பு  அறுத்தோன் என்கிறார். ஆசை அறுத்தோன் என்கிறார். அவர் ஒரு இடத்திலாவது கடவுளை அயோக் கியனாகவோ, ஒழுக்க ஈனம் உடையவனா கவோ,  வஞ்சகனாகவோ, விபசாரியாகவோ  சிருஷ்டித்திருக்கவில்லை. (குடிஅரசு 13.11.1948)

வள்ளுவர் தமது குறளில் எங்கேயாவது கடவுள் என்று குறிப்பிட்டிருக்கிறாரா? ஆனால் சில நற்பண்பு கொண்ட மகனை வழிபடுக என்று கூறியிருக்கிறார். வழிபடு என்றால் பின்பற்றிநடஎன்பதுதானே? மோட் சம்  என்கிற கருத்தைக் தரக்கூடிய ஒரு சொல்லே, தமிழில் கிடையாது. அப்படியிருக்க அதை அவர் எப்படி குறிப்பிட முடியும்? வீடு என்கிற சொல்தான் மோட்சத் தைக் குறிக்கிறது தென்றால் தமிழ் மக்கள் வீடு இல்லாமலா இருக்கின்றார்கள்? ஒவ்வொரு வருக்கும் ஒரு வீடு உண்டு. (குடிஅரசு 7.5.1949)

வள்ளுவர் அந்தக் காலத்தில் வாழ்ந்த ஒரு சமதர்ம வாதியாவார் என்று கூடக் கூறலாம். ஏனென்றால் பொதுவுடைமை யின் அடிப்படையை நாம் குறளில் காண முடிகிறது.

தை மாதத்தை ஆண்டின் முதல் மாதமாக குறிப்பிடும் பழங்கால கல்வெட்டு

    January 13, 2022 • Viduthalai

தை மாதத்தை வருடத்தின் முதல் மாத மாக குறிப்பிடும் பழங்கால கல்வெட்டு கண்டு பிடிப்பு கீழக்கரையில் தை மாதத்தை வருடத்தின் முதல்மாதமாக குறிப்பிடும் பழங்கால கல்வெட்டு கண்டுபிடிக்கப்பட்டுஉள்ளது.

ராமநாதபுரம் மாவட்டம் கீழக்கரையில் வள்ளல் சீதக்காதி சாலையில் உள்ள ஜும்மா பள்ளிவாசலில் காலச்சக்கர பழங்கால கல் வெட்டு ஒன்று உள்ளது. அந்த கல்வெட்டில் தை மாதத்தை தமிழ் ஆண்டு ஆரம்ப மாதமாக குறிக்கப்பட்டு உள்ளது. அதாவது சூரியன் உத்ராயணத்தில் பிரவேசிக்கும் மாதமாகிய தை மாதத்தில் ஆரம்பித்து ஆனியில் முடி வுற்று பின் அங்கிருந்து தட்சனாயனத்தில் பிரவேசிக்கும் மாதமாகிய ஆடியில் ஆரம் பித்து மார்கழியில் முடிவடைகிறது.

முற்காலத்தில் கோள்களின் சுழற்சியை அடிப்படையாக கொண்டே காலத்தை கணித்துள்ளார்கள். பூமியின் சுழற்சியால் சூரியன் பூமியின் தென்பகுதியில் இருந்து வடபகுதியின் கடைசிக்கும், வடபகுதியில் இருந்து தென்பகுதியின் கடைசிக்கும் செல்ல முறையே 6 மாத காலங்கள் எடுத்துக்கொள் கிறது. இதற்கு முறையே உத்தராயனம் என் றும் தட்சனாயணம் என்றும் கூறப்படுகிறது. ஒரு ஆண்டை 12 ராசிகளாக பிரித்துள்ளார் கள். ஒவ்வொரு ராசியிலும் சூரியன் பிரவே சிக்கும் நாட்களே அந்த மாதத்தின் மொத்த நாட்களாக கணக்கிட்டுள்ளனர். சூரியன் உத்ராயனத்தில் பிரவேசிக்க தொடங்கும் முதல் மாதமே ஆண்டின் முதல் மாதம் என்றும் அதுவே தை மாதம் எனவும், சூரியன் உச்சம் பெரும் மாதம் சித்திரை என்றும், அவ்வாறு சூரியன் தெற்கில் இருந்து வடக்கு நோக்கி உத்தராயனத்தில் (மகர ராசியில்) பிரவேசிக்கும் காலமே சிறந்த உத்தம காலம் என்றும் ஜோதிட வல்லுனர்களின் கணிப்பாக உள்ளது.

தை மாதத்தில் அதிக வெப்பம் மற்றும் அதிக குளிர் இல்லாமல் இதமான சூழல் இருக்கும். தைப்பிறந்தால் வழி பிறக்கும் என்ற பழமொழிக்கு ஏற்ப சுப காரியங்கள் இந்த மாதத்தில் ஆரம்பிப்பதும், செயல் படுத்துவதும் சிறப்படையும் என்ற நம்பிக்கை மக்களிடம் உண்டு. மார்கழியில் அறுவடை முடித்து புது அரிசி கொண்டு சூரியனுக்கு பொங்கலிட்டு உழவர்கள் தை மாதத்தை வரவேற்கின்றனர். இந்த வழக்கம் பண்டைய காலத்தில் இருந்தே தொடர்கிறது என்பதை இலக்கியங்கள் தெரிவிக்கின்றன. ராஜராஜ சோழன் தன் களஞ்சியத்தில் உள்ள பழைய தானியங்களை எடுத்து தர்மம் செய்துவிட்டு புதிய தானியங்களை கொள்முதல் செய்து விடுவாராம். இதுபோன்ற பல சிறப்புகள் தை மாதத்திற்கு இருந்து வருகிறது.

இதன்படி 2006-2011ஆம் காலத்திலிருந்த தமிழக அரசு தை மாத பிறப்பை தமிழ் புத் தாண்டாக அறிவித்தது. இந்த அறிவிப்பிற்கு ஏற்பும், சிலரின் எதிர்ப்பும் இருந்து வந்தது. இந்த நிலையில் ஆட்சி மாற்றம் ஏற்பட்டதும் இந்த அறிவிப்பை நீக்கி மீண்டும் சித்திரை மாதத்தின் முதல் தேதியே தமிழ் புத்தாண்டு பிறப்பாக அறிவிக்கப்பட்டது. தற்போது காணப்பட்டுள்ள முன்னோர்களின் பழங்கால கல்வெட்டு தை மாதத்தை தமிழ் மாதத்தின் தொடக்க மாதமாக ஆரம்பித்துள்ளதை நிரூபித்துள்ளது. 300 ஆண்டுகளுக்கு முன்பு தை மாதத்தை தமிழ் வருடத்தின் முதல் மாதமாக கடைப்பிடிக்கப்பட்டு வந்திருக் கலாம் என்பதற்கு சான்றாக இந்த பழங்கால கல்வெட்டு உள்ளது. இந்த தகவலை கீழக் கரை வரலாற்று தொல்லியல் ஆய்வாளர் விஜயராமு தெரிவித்தார்.

பொங்கல்

   January 13, 2022 • Viduthalai

பொங்கல் நாள் ஒன்றுதான் தமிழர் நாள்; மற்ற பண்டிகைகளெல்லாம் பெரிதும் தமிழ ருக்கு அவமானம், கேடு, தமிழர்களைக் கொலை செய்த, செய்யும் நாள்.

- விடுதலை 18.01.51

பொங்கல் தான் அறிவுக்கு ஒத்தது, தமி ழர்களுக்கான பண்டிகை; தமிழர்கள் இதைத்தான் தங்களின் விழாவாகக் கொண் டாட வேண்டும். மூடநம்பிக்கை, முட்டாள் தனமற்ற அறிவிற்குப் பொருத்தமான விழா வாகும்.

- விடுதலை 23.1.1968

பொங்கல் பண்டிகை என்பது நாள், நட்சத்திரம், மதக் கதை ஆதாரம் முதலி யவை எதுவுமே இல்லாமல் தை மாதம் ஒன்றாம் தேதி என்பதாக, தை மாதத்தையும் முதல் தேதியையுமே ஆதாரமாகக் கொண் டதாகும்.

- விடுதலை 13.1.1970

பொங்கல் பண்டிகையின் தத்துவம் என்னவென்றால் விவசாயத்தையும், வேளாண்மையையும் அடிப்படையாகக் கொண்டு அறுவடைப் பண்டிகையென்று  சொல்லப்படுவதாகும்.

- விடுதலை, 13.1.1970

தமிழ் மக்களுக்குப் பாராட்டத் தகுந்த ஒரு உண்மையான திருநாள் உண்டு என் றால் அது தமிழர் திருநாளாகிய பொங்கல் திருநாள்தான். 

- விடுதலை, 15.1.1973

பாடுபடும் பாட்டாளிகளின் மனம் பொங்கிப் பூரிப்புக் கொள்ளும் புது நாள் பொங்கல் நாள். பொங்கல் நாள் புதுமை வீறு பெறும் நாள். உணவில், உடையில், உறை யும் மனையில், உள்ளத்தில் செயலில் இவ் வாறு அகமும் புறமும் புதுமை பார்க்கு மிடமெங்கும் நீக்கமற நிறைந்திருக்கும் புதுமை. புதுமை நிலையானதல்ல; புதுமை பழமையாகும்; மீண்டும் புதுமை தோன்றும். அப்புதுமையும் மகிழ்ச்சியோடு வரவேற்கப் படும். ஆண்டு தவறாமல் வந்து சென்ற பொங்கலும், அடுத்தடுத்த ஆண்டுகளில் வரவிருக்கும் பொங்கலும் இதைத்தானே நமக்கு பாடமாக உணர்த்த முடியும்?

- குடிஅரசு, 10.1.1948

ஆரியமும் - திராவிடமும் கலந்தது. ஆனால் பாலும் நீரும் போல அல்ல. எண்ணெய்யும், தண்ணீரும் போல, இதோ எண்ணெய்! இதோ நீர்! சுயமரியாதையும் இயக்கம், . இதோ ஆரியம்! இதோ திரா விடம்! என உலகமறியப் பிரித்துதெடுத்து உணர்த்தினும், இந்திக் கட்டாய எதிர்ப் புணர்ச்சி அது  உண்மைதான் என உலகை அறிந்து கொள்ளச் செய்தது. அன்று தொட்டுத்தான் பூஜா மனோபாவத்துடன், சங்கராந்திப் பண்டிகையாக இருந்த  பொங் கல் நாள். தமிழ் நாளாக, தமிழர் நன்னாளாக திராவிடர் திருநாளாக பொங்கல் புதுநாளாக மலர்ந்தது. விரிந்தது என்ற உண்மையைத்  திராவிடம் நன்கறியும்.

- குடிஅரசு, 10.1.1948

உழுது பாடுபட்ட பாட்டாளி உழுபயன் காணும் நாள்!  (பொங்கல்) உலகம் மகிழும் நாள்!! மழையென்றும் வெய்யில் என்றும் பாராமல், மனைவி மக்கள் ஆகிய முழுக் குடும்பத்துடனும் மாட்டுடன் போட்டி போட்டுழைத்து, எதிர்பார்த்தும் - எதிர் பாராமலும் வரும் எல்லாவகைக் கேட்டி னையும் சமாளித்து, இரத்தத்தை வியர்வை யாகப் பிழிந்து, அதுபோதாமல் அட்டை களுக்கும், பாம்புகளுக்கும் பச்சை ரத்தம் பரிமாறிய உழவன். நெறியும் நெற்குலை கண்டு நீண்ட நெட்டுயிர்ப்போடு, ஆனந்த பரவசனாய் அடையும் அமைதிக்கு எதனைத்தான் எடுத்துக்காட்டாகக் சொல்ல முடியும்?

- குடிஅரசு, 15.1.1949

இரட்டைப் பிள்ளைகளைச் சுமந்து வருந்திய தாய், பின் ஈன்ற போது, அவற்றின் இன்முகம் கண்டு மகிழும் மகிழ்ச்சியைக் கூட, உழவனின் மகிழ்ச்சிக்கு ஒப்பாகச் சொல்ல முடியாது. ஆம்! தாய்மை உணர்ச்சி யில் ஒரு தனிப் பெரும் இன்பம் உண் டென்றால், அந்தத் தாய்மை உணர்ச்சி என்பது, உழவனின் தாய்மை உணர்ச்சியின் முன்பு ஒரு மிகச் சிறிய பகுதியேயாகும். உண்டி கொடுத்தோர் உயிர்கொடுத்தோரே அல்லவா?

- குடிஅரசு, 15.1.1949

 ஏய்க்கப் பிறந்தவன் பார்ப்பான் - ஏமா றப் பிறந்தவன் தமிழன் என்று பார்ப்பனர்கள் எழுதி வைத்துக் கொண்டிருப்பதை நடை முறையில் வற்புறுத்திக் கொண்டிருந்தன சங்கராந்தி அதுபோன்ற மற்றவைகள். அதாவது தமிழனுக்கு உரியது, பெருமை தரக்கூடியது எதெது உண்டோ, அதெல்லா வற்றையும் உருவைமாற்றி பெயரை மாற்றிச் சமஸ்கிருதக் கலப்பை - ஆரியக் கலப்பை யுடையது போல ஆக்கிவிட்டார்கள் பார்ப் பனர்கள். ஏமாந்த இனம் அதை ஏற்றுக் கொண்டது. பொங்கல் சங்கராந்தியாக ஆனது. 

- குடிஅரசு 22.1.1949

தீபாவளி போன்ற மூடநம்பிக்கையும், சுயமரியாதை அற்றதும், ஆபாசமானதுமான பண்டிகைகள் கொண்டாடுவதை விட இப்படி தமிழ்த் திருநாள் (பொங்கல்) என்று தமிழ் மக்கள் கூட்டுறவுக்கும், மகிழ்ச்சிக்கும் கொண்டாட்டத்துக்கும் அனுகூலமாகத் திருநாள்களை பரப்ப வேண்டும்.

- குடிஅரசு 26.1.1946

பார்ப்பனர்கள் பொங்கல் விழாவைக் கொண்டாடுகிறார்களா?

   January 13, 2021 • Viduthalai

பெரியார் மறுமொழி தமிழர் திருநாள்

தமிழர்களிடையே கொண்டாடப்பட்டு வரும் விழாக்களில் பல, தமிழர்களை இழிபடுத்துவனவாகவும், தமிழை அழிவுபடுத்துவனவாகவும், பொருளற்றனவும் அறிவுக்குப் பொருத்தமற்றனவுமான தொன்ம (புராண) கதைகளைப் பின்புலமாகக் கொண்டனவாகவும் இருந்த போதிலும் மக்கள் அவற்றையெல்லாம் பெரும்பொருட் செலவிலும் ஆரவாரமாகவும் கொண்டாடுவதில் பெரிதும் ஈடுபாடும் முனைப்பும் உடையவர்களாய் இருக்கின்றனர். இதனால் கடன்பட்டு உழல்வாரும் பலர்.

இந்நிலைகளுக்கு மாற்றாகவும், தமிழ் மக்களிடையே தமிழிய உணர்வும் இனநல உணர்வும் கிளர்ந்தெழுதற்கு வாய்ப்பாகவும், பொங்கலை வாழ்வியல் சிறப்பு விழா வாகக் கொண்டாடுவதோடு, இயக்க நிலைப்படுத்தியும் நாடெங்கும் நிகழ்ச்சிகள் நடத்த வேண்டும் என்று பெரு மக்கள் சிலர் மனங்கொண்டனர்.

பேரா. கா. நமச்சிவாயனார் ஏறத்தாழக் கடந்த எழுபது ஆண்டுகளுக்கு முன்னர்ப் பொங்கல் தமிழ் விழாவாகக் கொண்டாடப்பட வேண்டும் என்னும் முயற்சியில் முனைப்புடன் ஈடுபட்டார். தமிழ்ப் பேரறிஞர்கள், தமிழுணர்வுடைய அரசியல் கட்சித் தலைவர்கள் முதலானோரைக் கண்டு அளவளாவியதன் விளைவாகப் பொங்கல் தமிழர் திருநாளாக மலர்ந்தது. நாடெங்கும் பல்வேறு அமைப்புகளின் சார்பாகத் தமிழர் திருநாள் கூட்டங்கள் எழுச்சியுற நடைபெறலாயின.

தமிழர் திருநாள் தொடர்பாக மலேயாவில் உள்ள பெரியவர் புலவர் கா.ப. சாமி அவர்கள் கூறியுள்ளது அறியத் தக்கது. அது வருமாறு:

1937இல் திருச்சியில் அனைத்துத் தமிழர் மாநாடு என்று ஒரு மாநாடு, பசுமலை சோமசுந்தர பாரதியார்  தலைமையில் நடைபெற்றது. அதில் கா. சுப்பிரமணி யனார், மதுரைத் தமிழவேள் பி.டி. இராசன், திரு.வி.க., மறைமலையடிகளார் முதலான தமிழறிஞர்கள் பலர் கலந்து கொண்டனர். நானும் அக்காலத்தில் இந்தி எதிர்ப்புப் போரில் பங்கு பெற்றிருந்தமையால், அங்கு இருந்த சூழ்நிலையில், அம் மாநாட்டிற்குச் சென்றிருந் தேன். அந்த மாநாட்டில், பொங்கல் சமய விழாவா, சமய மற்ற விழாவா என்று கடுமையான தருக்கம் நடைபெற்றது.

இறுதியாக மறைமலையடிகளார் திட்டவட்டமாகச் சொல்லிவிட்டார் இது (பொங்கல்) சமயச் சார்பு இல்லாத விழா. எந்தச் சமயத்துக்காரன், இந்த விழாவை எடுத்துள்ளான்? எந்த இலக்கணம் இதற்கு இருக்கிறது? எந்தப் புராணம், எந்த இதிகாசம் இருக்கிறது? எனவே, எந்தப் புராணமும் இல்லாத போது, தமிழில் புறநானூற்றில் பிட்டங் கொற்றனின் வரலாற்றில் கருவூர்க் கதப்பிள்ளை சாத்தனாரின் பாடலில் சான்று இருக்கிறது. இதை யார் மறுக்க முடியும்? நண்பர் ஈ.வெ.இரா. இதை ஏற்றுக் கொண் டாலும் சரி, ஏற்றுக் கொள்ளா விட்டாலும் சரி! என்றார்.

இல்லை; நான் ஏற்றுக் கொள்கிறேன் என்று பெரியார் தெளிவாக மறுமொழி உரைத்தார். பெரியார்தாம் இம் மாநாட்டை நடத்தினார்.

பொங்கல் மதச்சார்பற்ற, முதன்மையான, பொன்னான விழா என்பதை நான் ஏற்றுக் கொள்கிறேன் என்று பெரியார் சொன்னதும் அனைவரும் கையொலி எழுப்பினர். திரு.வி.க எழுந்து, அருமை நண்பர் ஈ.வெ.இரா. அவர்கள், பொங்கலைச் சமயச் சார்பற்ற ஒரு தனிப் பெருந் தமிழர் விழா என்று ஏற்றுக் கொண்டமைக்குத் தமிழுலகமே பாராட்டக் காத்திருக்கிறது என்று குறிப் பிட்டார். அதன் பிறகுதான் மிகச் சிறந்த விழாவாகப் பொங்கலை அனைவரும் ஏற்கத் தொடங்கினர்.

இச்செய்தி பலருக்குத் தெரியாது. நான் அம்மாநாட்டில் கலந்து கொண்டேன். எனக்கு அப்பொழுது அகவை 19.

அம்மாநாடு சிறப்பாக இந்தியை எதிர்ப்பதற்கு கூட்டப்பட்டதுதான். அதில்தான் பொங்கலைப் பற்றிய தீர்மானம் நிறைவேற்றப்பட்டது.

தீர்மானத்தைமுன்மொழிந்தவர் பி.டி. இராசன். வழிமொழிந்தவர் திரு.வி.க. தமிழர் திருநாள் கொண்டாடத் தொடங்கிய பின் வகை வகையான பொங்கல் வாழ்த்துக் கள் எழிலார்ந்த தோற்றத்தொடும், இனிய தமிழிலும் ஏற்றமிகு கருத்துகளொடும் மக்களிடையே பரவின. ஆரியப் பார்ப்பனர்கள் நடத்திய இதழ்கள் தீபாவளி மலர் வெளியிட்டு வந்ததைப் போல், தமிழுணர்வார்ந்த ஏடுகள் பொலிவான தோற்றத்தோடு பொங்கல் மலர் வெளியிடலாயின.

மேற்கூறியவாறு பல்வேறு அமைப்புகளின் சார்பில் ஆங்காங்குத் தமிழர் திருநாள் கூட்டங்கள் எழுச்சியுற நடத்தப்பட்டன. தூயதமிழ்க் காவலர் கு.மு .அண்ணல் தங்கோ அவர்கள் தமிழர் திருநாளை ஆண்டுதோறும் பத்துநாள் விழாவாகப் பல்லாண்டுக் காலம் நடத்திவந்தார் என்பது குறிப்பிடத்தக்கது.

பெரியார் மறுமொழி

பொங்கற் பெருநாளைத் தமிழர் திருநாளாக அறிவித்து அதனைத் தமிழ்நல, இனநல இயக்கங்களும் பிறவும் எழுச்சியுறக் கொண்டாடத் தொடங்கிய அளவில் அது தமிழ்மக்கள் வாழும் அயல்நாடுகளிலும் பரவலாயிற்று. ஆயினும் மலேயா -- சிங்கப்பூர் நாடுகளில் தமிழர் திருநாளைப் பரப்புவதில் பெரிதும் முனைந்து நின்றவர் களுட் சிலரே அதில் சற்று முரண்படுவார் ஆயினர்.

தமிழர்களில் கடவுள் நம்பிக்கையும் சமயப்பற்றும் கொண்டவர்களின் பொங்கல் கொண்டாட்டத்தில் சமயக் கடைப்பிடிகள் சில ஒட்டி நிற்றலைச் சுட்டிக்காட்டி, பொங்கல் விழா இந்துமதப் பண்டிகை யென்றும், அது தமிழர் திருநாளாகாது என்றும், தமிழர் திருநாளைப் பொங்கலொடு சார்த்தக் கூடாது என்றும், பொங்கற் பெருநாள் வேறு; தமிழர் திருநாள் வேறு என்றும் குறுக் குச்சால் ஓட்டத் தொடங்கினர்.

மலேயா -_ சிங்கப்பூரில் பொங்கல் நன்னாளே தமிழர் திருநாள் என்பாரும், அது இந்துமத விழாவே; தமிழர் திருநாள் அன்று என்பாருமாய்த் தமிழர்கள் முரண்பட்டு நின்ற நிலையில், அங்குச் சுற்றுச் செலவு மேற்கொண் டிருந்த தன்மானத் தந்தை பெரியார் ஈ.வெ.இரா. அவர்க ளிடம் இதுபற்றி அவர்தம் கருத்தை அன்பர்கள் உசாவி னர். அப்போது பெரியார் அவர்கள் கூறிய மறுமொழி பலரையும் வியப்பில் ஆழ்த்தியது!

அதுவருமாறு: பொங்கல் தமிழர் விழாதான். அது இந்துமத விழா ஆகாது. இந்தமத விழாவாக இருந்தால், மற்ற மற்ற இந்துமத விழாக்களைப் போல் இந்தியா முழுவதும் கொண்டாடப்படுமா இல்லையா? அப்படிக் கொண்டாடப்படுவது இல்லையே, அது ஏன்? பொங்கல் தமிழ்நாட்டில் மட்டுந்தானே, அதிலும் தமிழர்களால் மட்டுந்தானே கொண்டாடப்படுகிறது!

பார்ப்பனர்கள் அதைக் கொண்டாடுகிறார்களா? இல்லையே! இந்துமத விழாவாக இருந்தால் அதைப் பார்ப்பான் கொண்டாடாமல் இருப்பானா?  அவன்தானே, அதைக் கொண்டாடுவதில் முந்திக் கொண்டு நிற்பான்! பார்ப்பான் அதைக் கொண்டாடவில்லை; கண்டு கொள்ளாமல் இருக்கிறான் என்றால் என்ன பொருள்? அது தமிழர் திருநாள் என்பதுதானே! இதில் என்ன அய்யப்பாடு?

- நூல்: "தமிழ்த் தேசிய திருநாள்'

புலவர் இறைக்குருவனார்